Cronfa Codi’r Gwastad Powys - Rownd 2

Mae’r arolwg hwn wedi cau.

Cyflwyniad

Yn 2021, cyflwynodd Cyngor Sir Powys gais i Gronfa Codi’r Gwastad Llywodraeth y DU i geisio cael nawdd ar gyfer cynllun i ddarparu seilwaith newydd cerdded a seiclo, ailwampio Hawliau Tramwy a gosod wyneb newydd ar ffyrdd. Ar y cyd, bydd yr elfennau hyn o’r cynllun yn gwella darpariaeth cerdded a seiclo yn y sir ac yn cynyddu hyfywedd y sir a’i gwneud yn fwy atyniadol i ymwelwyr. Gellir dod o hyd i ddisgrifiadau a lleoliadau’r elfennau hyn o’r cynllun isod. Fel rhan o’r broses ymgeisio, mae’r cyngor bellach yn ceisio cael safbwyntiau busnesau a sefydliadau lleol er mwyn deall yn well sut y byddan nhw a’r wlad ehangach yn elwa.

Diben y gronfa yw darparu buddsoddiad un-tro i seilwaith a fydd yn gwneud gwir wahaniaeth i bobl leol a’r economi leol. Mae’r cynigion canlynol yn creu rhestr fer o’r rhestr o opsiynau a ddynodwyd yng Nghynllun Trafnidiaeth Leol Canolbarth Cymru 2015-20 yn seiliedig ar sut y maen nhw’n alinio â gofynion ar gyfer Cronfa Codi’r Gwastad. Ar y cyd, bydd y cynlluniau yn darparu cysylltedd gwell i ymwelwyr a phreswylwyr, fel ei bod yn haws crwydro a chwilota golygfeydd unigryw’r sir a’i threfi marchnad.

Caiff y cynlluniau canlynol eu cynnig: 

Teithio Llesol

• Llwybr cerdded a seiclo a rennir rhwng Llandrindod a Howey ar hyd ochr ddwyreiniol yr A483
• Llwybrau cerdded a seiclo rhwng Crughywel a Llangatwg

Hawliau Tramwy

Mae sawl strwythur mawr ym Mhowys nad yw’n ffit i’w dibenion ac sydd bellach yn anodd eu cyrraedd neu mewn perygl o fod felly o ganlyniad i’w cyflwr gwael. Caiff y strwythurau hyn eu hystyried fel cysylltiadau allweddol sy’n sicrhau cysylltedd lleol; heb ymyrraeth, bydd gan y rhwydwaith Hawliau Tramwy presennol fylchau sylweddol. Mae’r ailwampio Hawliau Tramwy sydd wedi ei gynnwys fel a ganlyn ac i’w weld ar y map isod:

• Pont Afon Gam, Llangadfan
• Pompren Du, Berriew
• Pompren Fron, Garthmyl
• Pompren gwyl, Caersws
• Devil’s Gulch (Cwm Elan)
• Pompren Pont y Milgu, Cwm Twrch

Gwaith gosod wyneb newydd ar ffyrdd

Mae ymgysylltiad cyhoeddus ym Mhowys yn dangos yn gyson fod atgyweirio ffyrdd, llwybrau troed a llwybrau seiclo yn bwysig iawn i ddefnyddwyr y briffordd a chymunedau lleol. Esblygodd y rhwydwaith priffyrdd lleol dros gyfnod hir iawn o amser ac felly ni chafodd llawer ohono ei gynllunio na’i adeiladu i’r safon y byddem yn ei ddisgwyl ar gyfer priffordd newydd ei hadeiladu heddiw. O ganlyniad mae llawer o briffyrdd lleol yn llai cydnerth o ran gofynion traffig newidiol (llif traffig, offer amaethyddol ac arallgyfeirio) a digwyddiadau tywydd difrifol. Cafodd y lleoliadau allweddol sydd angen wyneb newydd wedi’i gosod arnynt eu dynodi gan y Cyngor er mwyn gwella mynediad at lwybrau cerdded a seiclo ac atyniadau i ymwelwyr. Caiff ardaloedd dangosol ble mae cynllun gosod wyneb newydd yn cael ei gynnig i’w gweld ar y map isod.