Powys Gynaliadwy

Cefndir

Mae darparu gwasanaethau llywodraeth leol gwerthfawr wrth wraidd popeth a wnawn. Gydag amseroedd cyfnewidiol a’r amodau economaidd, mae angen i ni fod yn rhagweithiol, yn arloesol ac yn flaengar er mwyn darparu gwasanaethau cyhoeddus o safon ar gyfer y dyfodol.

Rydym yn cydnabod yr heriau ac rydym am weithio mewn partneriaeth i archwilio'r cyfleoedd i wneud y newidiadau sydd eu hangen i adeiladu dyfodol cryfach, tecach a gwyrddach i Bowys.

Y sefyllfa ariannol

Mae'r argyfwng economaidd presennol a chostau byw cynyddol yn golygu bod Cyngor Sir Powys yn rhagweld bwlch o dros £20 miliwn ar gyfer blwyddyn ariannol 2024/25. Mae disgwyl i hyn gynyddu i £44 miliwn neu fwy dros y pedair blynedd nesaf. Mae hyn yn gadael bwlch sylweddol yn ein cyllid sydd ar gael ac yn golygu na allwn fforddio parhau i ddarparu ein gwasanaethau yn yr un modd.

Mewn blynyddoedd blaenorol rydym wedi edrych ar ein gwasanaethau i ddod yn fwy effeithlon. Er bod newidiadau wedi'u gwneud, nid yw'r dull hwn yn gynaliadwy yn y tymor hir ac mae angen i ni nawr fod yn fwy radical a newid ein dull.

Beth yw ‘Powys Gynaliadwy’?

Yng Nghyngor Sir Powys, rydyn ni’n mabwysiadu dull newydd o gynllunio a darparu gwasanaethau cyhoeddus yn y dyfodol.

Rydym am sicrhau y gallwn ddarparu gwasanaethau cryfach, tecach a gwyrddach wrth symud ymlaen, tra'n aros o fewn y gyllideb sydd ar gael.

Mae 'Powys Gynaliadwy' yn ddull rhagweithiol o fynd i'r afael â hyn - gan adolygu pa wasanaethau a ddarperir a sut, tra'n cydweithio â chymunedau lleol i archwilio datrysiadau arloesol.

Sut allwch chi gymryd rhan?

Mae ymgysylltu yn rhan bwysig o Powys Gynaliadwy. Rydym eisiau i bawb gael y cyfle i ddweud eu dweud a helpu i lunio dyfodol Powys - p'un a ydych yn breswylydd ym Mhowys, yn aelod o staff, yn gynghorydd neu'n rhanddeiliad arall. Dim ond drwy gydweithio y gallwn wireddu ein huchelgais. Cymerwch ran!

Mae nifer o ffyrdd i gymryd rhan:

	Rhannu syniadau. Cliciwch yma neu ewch i waelod y dudalen a chliciwch ar y tab syniadau isod.
	Atodi pin a sylw ar y fap o Bowys. Cliciwch yma neu ewch i waelod y dudalen a chlicio tab y map isod a dewiswch yr ardal hoffech chi wneud sylw arni.
	Ymunwch â Phanel Pobl Powys. Os hoffech gael eich cynnwys a derbyn gwahoddiadau i gymryd rhan o dro i dro, ticiwch y blwch ar broffil Fy Nghyfrif: https://cy.powys.gov.uk/mewngofnodi
	Cysylltu â’ch Cynghorydd. Caiff Cynghorwyr Lleol eu hethol gan y gymuned i benderfynu sut dylai’r cyngor ymgymryd â’i wahanol weithgareddau. Defnyddiwch y dolen isod i ddod o hyd i’ch Cynghorydd: https://cy.powys.gov.uk/cynghorwyr