Gwella Gyda'n Gilydd: Llunio dyfodol gwasanaethau iechyd diogel, o ansawdd uchel i Bowys.

Beth sy'n digwydd?

Ar draws y DU a Chymru, mae'r GIG dan bwysau. Ym Mhowys, rydym hefyd yn wynebu heriau ein hunain.

Rydym wedi profi llawer o newidiadau mawr yn ystod y blynyddoedd diwethaf, gan gynnwys:

• pandemig COVID-19,
• galw cynyddol am driniaethau,
• mwy o bobl yn byw'n hirach gyda dau neu fwy o gyflyrau iechyd,
• rhestrau aros cynyddol,
• a chynnydd mawr yng nghost tanwydd, bwyd a biliau eraill.

Gyda'i gilydd, mae'r newidiadau hyn hefyd yn golygu bod ein gwasanaethau gofal iechyd presennol bellach yn costio mwy nag y gallwn ei fforddio.

Beth yw'r heriau yma ym Mhowys?

Gyda'r heriau hyn mewn golwg, rydym yn edrych ar y ffordd orau o gynllunio ymlaen llaw fel bod ein gwasanaethau gofal iechyd yn diwallu eich anghenion chi, eich teulu, a'n poblogaeth gyfan. Nid yn unig nawr, ond yn y dyfodol.

Rydym wedi galw ein cynllun sydd ar y gweill yn Gwella gyda’n Gilydd. Dyma ein sgwrs fawr gyda chi, pobl Powys. Trwy wrando a deall sut beth yw gwasanaethau gofal iechyd i chi, byddwn yn gallu cynllunio a llywio dyfodol gwasanaethau iechyd diogel ac o ansawdd i'n sir i'r degawd nesaf.

Beth arall sydd angen i mi ei wybod?

Mae Gwella Gyda'n Gilydd yn ymwneud ag adeiladu ar y cryfderau sydd gennym ym Mhowys, mynd i'r afael â gwendidau, dod o hyd i gyfleoedd i wella, ac ymateb i heriau. Mae hon yn daith a fydd yn cymryd sawl mis i'w dylunio - a gall gymryd sawl blwyddyn i'w chyflawni'n llawn. Rhan gyntaf y daith hon yw sicrhau bod gennym ddealltwriaeth o'r problemau y mae angen i ni eu datrys. I ddechrau'r sgwrs hon, rydym yn awyddus i ddarganfod gennych:

• beth sy'n dda am wasanaethau iechyd ym Mhowys (cryfderau allweddol)
• beth sy'n wael ac nad yw'n gweithio mor dda (y gwendidau yn ein cynnig gofal iechyd)
• pa syniadau sydd gennych chi a all ein helpu ni wella (cyfleoedd)
• pa rwystrau all fod yn y ffordd a’n hatal rhag gwneud y gwelliannau rydyn ni eisiau eu gwneud (bygythiadau)

Dywedodd Hayley Thomas, y Prif Weithredwr; “Ein huchelgais yw bod trigolion Powys yn derbyn gwasanaethau gofal iechyd diogel, o ansawdd da ac yn ddibynadwy. Rydym am wneud y defnydd gorau o'r adnoddau sydd gennym wrth sicrhau yn anad dim bod gofal a diogelwch cleifion ar flaen y gad ym mhopeth a wnawn.”

Erbyn pryd hoffem glywed eich barn?

Hoffem glywed eich barn erbyn hanner nos ddydd Sul 25 Mai 2025.

Rydym ni'n eich gwahodd i edrych ar yr holl ddogfennau gan gynnwys:

• Darllenwch y Crynodeb / Achos Llawn dros Newid (gweler y diffiniad isod). (Fersiwn Saesneg, Cymraeg i ddilyn)
• Gwyliwch ein fideo esboniadol.
• Cymerwch bip ar rai o'r pethau a glywsom y llynedd o gwmpas Gwella gyda’n Gilydd.
• Edrychwch ar y themâu allweddol a ddaeth i'r amlwg o sgyrsiau a gynhaliwyd gennym ni a sefydliadau partner.
• Ac yna cwblhewch yr arolwg.

Gallwch hefyd:

• Ffonio, ysgrifennu neu e-bostio ni i ofyn am gopïau caled o'r dogfennau.
• Ffonio ni ar 01874 442917 Gadewch neges yn nodi pa ddogfennau rydych chi eu heisiau gyda'ch enw a'ch cyfeiriad post, gan sillafu unrhyw eiriau anarferol. e.e. Enw'r Tŷ.
• Ysgrifennu atom yn: Gwella Gyda’n Gilydd, Bwrdd Iechyd Addysgu Powys, Tŷ Glasbury, Ysbyty Bronllys, Bronllys, Powys LD3 0LY
• E-bostio ni yn: powys.engagement@wales.nhs.uk
• Os ydych chi'n hapus i dderbyn gwybodaeth trwy e-bost, gallwch gofrestru ar gyfer ein gwasanaeth Newyddion Ymgysylltu am ddim yma sy'n anfon gwybodaeth yn uniongyrchol i'ch mewnflwch am gyfleoedd i ddweud eich dweud ar wasanaethau'r bwrdd iechyd.

Mae ein hysbysiad preifatrwydd ar gael yma os hoffech ei ddarllen.

Yn olaf, diolch am dreulio’r amser yn darllen ac ymateb. Mae eich barn yn bwysig i ni.

*Beth yw Achos dros Newid?

Mae Achos dros Newid yn tynnu'r holl wybodaeth a data sydd gennym am wasanaethau iechyd ym Mhowys at ei gilydd. Mae hyn yn golygu y gallwn weld yn glir beth sy'n digwydd o ran iechyd ein sir, beth sydd angen i ni ei ystyried a'i newid. Mae'n caniatáu inni feddwl am sut rydym yn ymateb a chynllunio ymlaen llaw ar gyfer y 10 i 25 mlynedd nesaf gan sicrhau bod gwasanaethau iechyd yn gynaliadwy a byddant yn cefnogi ac yn darparu ar gyfer ein trigolion.